2Th 1 | WSK | STEP | Ani Paul, se Silas, se Timothy, ana den imi bataguru nina nanga Ba Kaem, se Kari Biya Jesus Kristus ko kariimet Thessalonica bagasan mu ningarsan.

2 Thessalonians 1

Den gira

1 Ani Paul, se Silas, se Timothy, ana den imi bataguru nina nanga Ba Kaem, se Kari Biya Jesus Kristus ko kariimet Thessalonica bagasan mu ningarsan.

2 Nanga Ba Kaem, nanga Biya Jesus Kristus ilak, nunga nongomang yawara, se nunga lila ningarmon se te bagaralko.

Thessalonica Kris alo ikup gikasan, se Paul nongomang ira ko den nunga maonam

3 Nanga singsang, ana tom suen biya nina nego ko Kaem amilmil tusan. Se nu amilmil tunakko mu munan diram. Mu awuk, nenenga nengemang ningi nunguning mu yawarakala sokel ago lagawoso, se ninimi ko kuera ko munan mu betelatala lagawoso. 4 Umutang ko, ana Kris alo sor saki saki te anisan mu nomokete ninip patowasan. Ale ninga balsan, nina sumu te Thessalonica ningi bagasan se kari sang ninga bita maguwusan, bare nina nengemang ningi nunguning sail ago baga se, ikup yaman taiso mu gi se bagasan, uwutata ninga balsan.

5 Nina ikup gisan bare te sokel ago sanamasan mu te ana ikisan, Kaem nanga tuteso ale diram te koma nangarso. Nina aitak ninga Biya Kaem ko nup ko ikup memek towasan. Bare munan mu te Kaem nina wetang te ninga beteso, nina noko kingdom ningi bagaralko terong maman. 6 Kaem munan diram bitirukkowo! Nu kariimet nina ikup yaman ningarsan mu nu ikup yaman nungarukkowo. 7 Bare nina, se ana, ikup giwasan, mu nu ikup mu menawurok se yawarakala baganakko. Tom Kari Biya ko engel sokel ago mu arungu duruk wonong bitiruk ale tai kapuruk ale wetang te aratukko tom mu te nu butata bitirukko. ^{▼▼2 Thes 1:5-7 Memek koma kutuwura: Rom 12:19; Rev 6:10; 18:6-8. Jesus engel arungu peleruk tairukko: Mat 25:31.}

8 Kari Biya tama kuamili karogo aratuk ale, arikaya Kaem ko me ikisan, ale den gilalong yawara nanga Biya Jesus ko balso mu me karo tusan, mu koma ikup memek nungarukko. 9 Nu nunga karuk se nuna noko koma dugu te, noko nikinang sokel biyala mu te me bagomonko, kuwim kelemak te baga se tom suen biya memek te bagomonko. ^{▼▼2 Thes 1:9 Kariimet memek alo mu memek tamonko: Psa 79:6; Isa 66:15; Mat 25:41, 46; Rom 2:8-9; 2 Peter 3:7.} 10 Kari Biya ko tom te, mel uwutata aratukko. Bare kariimet noko nongomang ningi nunguning, mu noko amilmila se, nup biyala patawomonko. Nina betela uwutata beteralko. Mu awuk, nina Kaem ko den ana ninga manorman mu ko nengemang ningi nunguning aram.

11 Umutang ko, ana tom suen biya nina nego ko nanga Kaem ngatangorsan, nu ninga sanguk se aolak bagara ningo diram nu ko ninga auram mu te bagaralko. Ale sokel ningaruk se ikia munan ningo nengeta beteralko ikiwasan mu te beteral ale, ninga nengemang ningi nunguning te ura ningo ningo beteralko. 12 Munan umutang te, nina ningimik te, nanga Biya Jesus nup biya taukko. Se aking nu kumik te nina nup biya talko. Nanga Kaem, Kari Biya Jesus Kristus ilak ninga sangarmon se uwutata aratukko.